Duineveld Ondersteunersklub is 'n outonome liggaam van H/S Duineveld te Upington. Die klub bestaan uit alle ondersteuners (ouer as 18 jaar) van H/S Duineveld en Velties Sport.
Alle oud leerders, oud ouers, huidige ouers en enige ander ondersteuner van H/S Duineveld, die ou HTS Upington of die ou HHS Upington is welkom om aan te sluit by Duineveld Ondersteunersklub. Kontak ons by [email protected] as jy 'n amptelike Veltie Ondersteuner wil word. Ons het 'n klubhuis op H/S Duineveld skoolgronde, toegerus met 'n volledige kroeg, kombuis, braai area en binnenshuise aansit plek vir 80 persone, met 'n aangrensende braai area waar tot nog 30 mense onthaal kan word asook mans- en dames toiletgeriewe. Met sportdae op Duineveld sportgronde bedryf ons 'n Teetuin in die tuin voor die klubhuis en na afloop van die laaste wedstryd van die dag, open die klubhuis waar ons dan gewoonlik ook 'n steakbraai aanbied. Verder word gereelde funksies ook in die klubhuis aangebied met die doel om fondse in te samel wat weer aangewend word ter ondersteuning van Duineveld Sport.
Om alle aktiwiteite van H/S Duineveld te ondersteun deur bywoning van sportbyeenkomste en funksies en finansiële bystand te verleen aan alle buitemuurse bedrywighede, sportgroepe, -spanne en individuele sportmanne en –vroue.
Om skakeling tussen oudleerlinge onderling, asook tussen oudleerlinge en die skool te reël en te bewerkstellig.
As koördinerende en adviserende liggaam op te tree van die aksies van ondersteuners van die onderskeie aktiwiteite wat deur die skool en sy leerlinge beoefen word.
Om fondse en bates te verkry vir gebruik van die Klub.
Die ontwikkeling van tradisies en simbole van identiteit wat gestalte sal gee aan die voormelde doelstellings, te propageer.
Om blootstelling te gee aan ondersteuners soos sakemanne, besighede, boere en enige instansie of individue wat die skool ondersteun, bydraes maak en lid is van die klub.
