Die inherente behoefte aan "mooi" oomblikkies bestaan by mense en ek poog om dit te verewig in my skilderye
Ek wil graag in my skilderye 'n bietjie ontvlugting bied van die harde werklikheid van 'n gejaagde wêreld. Ek wil iets uitbeeld waarby mense normaalweg verby leef.
My kuns loopbaan moes vorm aanneem te midde van my "eerste" beroep as huisvrou en Ma ... en daarom het ek volstaan by 'n Graad in Beeldende Kunste en daarna gepoog om my werk te laat ontwikkel deur by kunsverenigings aan te sluit, praktiese werkswinkels by te woon en voort-durend dit wat ek leer in my werk toe te pas.
Ek glo dat (soos in enige beroep of vaardigheid) 'n mens méér leer uit praktiese ervaring as by 'n leermeester ... selfs al is 'n goeie leermeester van onskatbare waarde.
Die rigting waarin my werk ontwikkel, word beïnvloed deur dit waarvan ek hou, soos: Die Franse Impressionisme, Kunstenaars soos
Irmin Henkel en André de Beer,die sonnige Suid-Afrikaanse landskap en sommer net dinge wat my elke dag omring.
Presies waar ek" inpas" in die kunswêreld is nie vir my belangrik nie solank my skilderye "ontvlugting" bied en genot verskaf aan mense wat daarmee kan assosieer, is ek dankbaar.
