Die Evangelies-Gereformeerde Kerk van Suid-Afrika is 'n lewenskragtige evangeliese kerk wat op 'n Gereformeerde grondslag berus.
LEUSE: SO Sê die HERE"
Die Evangelies-Gereformeerde Kerk van Suid-Afrika is 'n lewenskragtige evangeliese kerk wat op gereformeerde grondslag berus. Moontlik het u nog nooit met die Kerk kennis gemaak nie. Dit mag selfs wees dat u nog nooit van die Kerk gehoor het nie. Deur verdraaide of gebrekkige inligting mag dit wees dat u 'n verkeerde begrip omtrent die Kerk het.
Ons beskou dit as 'n besondere voorreg om u langs hierdie weg in te lig en beter kennis te laat maak met die Evangelies-Gereformeerde Kerk van Suid-Afrika.
1. Die ontstaan van die Evangelies-Gereformeerde Kerk van Suid-Afrika
Die Kerk is gestig op 21 April 1944 deur 49 kerkraadslede van die N.G. Kerk, Smithstraat, Durban, onder die naam "Die Nuwe Protestantse Kerk in Afrika". Op 18 Augustus 1986 is die naam van die Kerk deur die Sinode verander na die Evangelies-Gereformeerde Kerk van Suid-Afrika. Die rede vir die naamsverandering was die voortdurende verwarring en assosiëring van die Kerk met die Pinksterkerke, terwyl die Kerk baie duidelik in die gereformeerde stroom is, maar met 'n sterk evangeliese karakter. Daar is gemeentes in al nege die provinsies van Suid-Afrika. Kenmerkend van die Kerk is die eenvoudige en verstaanbare boodskap wat onder inspirasie van die Heilige Gees na die mens gebring word onder die leuse "So sê die Here".
2. Die grondslag van die Kerk
Hierdie kerk is gefundeer op die Heilige Skrif, die onfeilbare Woord van God. Die leer wat die Kerk, op grond van God's Woord bely, is evangelies-gereformeerd en dit word uitgedruk in sy evangeliese belydenis en ook die gereformeerde belydenisskrifte, nl. Die Drie Formuliere van Enigheid. Die Kerk aanvaar die Formuliere as ondergeskik aan die Woord van God.
3. Die Boodskap wat die Kerk verkondig
Tereg kan saam met die apostel Paulus gesê word: "Want ek het my voorgeneem om niks onder julle te wees nie as Jesus Christus en Hom as gekruisigde". Die boodskap wat deur die Kerk uitgedra word sluit die volgende in:
3.1 Die verlossing van verlore sondaars (Efes. 1:7) en dat 'n mens in hierdie lewe sekerheid van saligheid kan bekom. (1 Joh. 3:15)
3.2 Die vervulling met die Heilige Gees (Efes. 5:18) en die noodsaaklikheid van die heiligmaking wat die wil van God is vir sy kinders. (1 Thes. 4:7-8)
3.3 Die persoonlike wederkoms van Jesus Christus voor die duisendjarige vrederyk. (1 Thes. 4:16-17, Open. 19:20)
3.4 Die genesing van die kranke liggaam, wat impliseer dat God vandag nog siekes genees op grond van die versoening van Christus Jesus. (Matt. 8:17-19)
Die kerk stel hom die volgende ten doel.
1. Om die Drie-Enige God te verheerlik asook om sy Koninkryk uit te brei.
2. Om die suiwere vrymakende evangelie, wat in staat is om te red en lewens te verander, met ywer in die krag van die Heilige Gees te verkondig. Ons doel is dus om die evangelie tot sy reg te laat kom, nl. Om mense eers vertikaal met God te versoen en dus hulle verhouding met God reg te stel. 'n Veranderde hart en 'n nuwe lewe lei dan noodwendig tot 'n horisontale versoening en 'n gepaardgaande beter verhouding tussen mense.
3. Om die oorspronklike Protestantse beginsels te beskerm en met nuwe krag te verkondig en uit te lewe. Om nie net in naam Protestants te wees nie, maar in wese, deur voortdurende protes teen die gees van die tyd, sonde, vervalsing, afvalligheid en dwaalleringe aan te teken soos die Protestanse Hervormers teen die misbruike van hulle tyd.
4. Om voortdurend te streef na vernuwing, asook varsheid van getuienis, ondervinding en boodskap, om daardeur te waak teen verval in dooie formalisme. Dat leersuiwerheid gepaard moet gaan met egte lewensvroomheid.
5. Om hom te beywer vir die kragtige uitbreiding van die Kerk van Christus en dit word vermag deur kinders van die Here op te roep tot ware Bybelse heiligmaking en vervulling met die Heilige Gees en so toe te rus vir hulle dienswerk.
6. Om as Kerk dinamies te wees vir ons tyd en om in die geestelike behoeftes en nood van mense te voorsien.
7. Om ware tuiste te wees vir die evangelies gesinde gelowiges wie se erns dit is om geestelik te groei en die Here te dien in 'n evangelies-gereformeerde atmosfeer, waarin die Heilige Gees werksaam is.
8. Om elke gelowige binne die Kerk ruimte te gee om met sy/haar besondere gawes te werk vir uitbreiding van die koninkryk van God in die wêreld, d.w.s. 'n egte belewenis vir aktiewe deurleefde Christenskap.
9. Om die gemeente in die algemeen en elke lidmaat afsonderlik effektief te versorg deur middel van persoonlike belangstelling in toegespitste ampsbediening van leraar en kerkraad in getroue huisbesoek en voorbidding.
10. Om die getroue toepassing van die norme van die Woord van God te handhaaf.